Sámi Nissonforum čoahkkanii vahkoloahpas Ubmejes ja doalai jahkečoahkkima, seminára ja prošeaktačoahkkima.

Seamma oktavuođas SNF geigii ovdánahtinbálkkašumi Rauna Kuokkanenii ja Valentina Sovkinai.

Symbolalaš ruhtasupmi bálkkašupmin

SNF bálkkašupmi lea diploma ja symbolalaš 1 000 Norgga ruvnnu ruhtasupmi.

Bálkkašupmi geigejuvvo gudnin sutnje dahje sidjiide, gean barggu SNF stivra atná leat dásseárvvu ja ovttaárvosašvuođa ovddideapmái ávkin sámi servodagas.

– Ruošša sámedikki presideanta Valentina Sovkina oažžu bálkkašumi go áŋgirit ja duostilit ovddida Ruošša sámiid vuoigatvuođaid, muitala Sámi Nissonforuma njunuš Gudrun E.E. Lindi NRK Sápmái.

Bálkkašupmi lei diibmá juo galgat sutnje geigejuvvot, muhto SNF:s ii lean dalle jahkečoahkkin ruhtavátnivuođa geažil. Danin oaččui Sovkina bálkkašumi easka dál.

Nubbi bálkkašuvvon nisu lea Rauna Kuokkanen, professor Toronto universitehta stáhtadiehtaga lágádusas ja eamiálbmotoahpuid prográmmas Kanadas. 

– Rauna Kuokkanen lea dutkan sámi iešmearrideami sámi nissonperspektiivvas ja dán barggu ovddas oažžu son ges bálkkašumi dán jagi, muitala Lindi.

Seminára sámenissoniid oassálastinvuoigatvuođas

SNF doalai vahkoloahpas maid seminára fáddán lei sámenissoniid oassálastinvuoigatvuohta – Maid dat mearkkaša sosiála dillái, dearvvasvuhtii ja veahkáválddálašvuođa eastadeapmái.

Rauna Kuokkanen, Jovnna-Jon-Ánne-Kirstte Rávdná, logaldalai Ubmejes fáttás Elsa Laulas Maxida Märakii: Sámenissoniid golbma radikála akšuvnna (measta) čuohte jagis.

Seminára loahpahuvvui páneladigaštallamiin mas lea sáhka das mo nanosmahttit sámenissoniid oassálastin- ja váikkuhanvuoigatvuođa.

SNF ovdánahtinbálkkašupmi 1999–2015